Frankryk se president kondig 'n styging in die minimumloon en 'n belastingverlaging aan

Frankryk se president kondig ‘n styging in die minimumloon en ‘n belastingverlaging aan

Die Franse president, Emmanuel Macron, het ‘n styging in die minimumloon en ‘n belastingverlaging aangekondig na weke van gewelddadige betogings teen sy regering.

Macron het in ‘n televisietoespraak gesê hy aanvaar sy deel van die aanspreeklikheid vir die krisis.

Hy het aangekondig dat ‘n ongewilde toename in belasting vir pensioenarisse opgeskort word en het sake-ondernemings wat dit kan bekostig gevra om werknemers ‘n eenmalige bonus te betaal, wat belastingvry sal wees.

Die minimuloon word met 100 euro per maand opgestoot.

Die toespraak volg na vier ure van krisissamesprekings gister met ministers, parlementêre leiers, sake- en vakbondverteenwoordigers en streeksamptenare.

Die Franse regering het reeds verlede week ‘n beplande toename in brandstofbelasting gekanselleer in ‘n poging om die betogers tevrede te stel.

Afgevaardigdes is beseer nadat geweld uitgebreek het by 'n ANC-konferensie

Afgevaardigdes is beseer nadat geweld uitgebreek het by ‘n ANC-konferensie

‘n Aantal afgevaardigdes is beseer nadat geweld uitgebreek het by ‘n ANC-konferensie in Potchefstroom in Noordwes om die party se provinsiale
kandidatelys vir aanstaande jaar se verkiesing saam te stel.

Een van die beseerdes is in ‘n hospitaal opgeneem met steekwonde.

Sommige afgevaardigdes beskuldig die provinsiale taakspan daarvan dat hy die lys gemanipuleer het.

Die ontevrede ANC-lede beweer dat daar takke is wat nie geverifieer is nie en dat daar nie aandag aan hulle griewe gegee word nie.

Floyd Shivambu se broer het na bewering R16-miljoen van die VBS Bank ontvang

Limpopo se burgemeesters wat meer as `n miljard rand in die VBS-bank belê het, hoor vandag hul lot

Limpopo se burgemeesters wat meer as `n miljard rand in die VBS-bank belê het sal vandag hoor wat met hulle gaan gebeur.

Die premier, Stan Mathabatha gaan `n forensiese verslag vrystel wat deur die tesourie in die provinsie aangevra is.

Dit volg na die Resewebank se verslag oor die VBS-bank wat twee senior ANC-amptenare, die tesourier Danny Msiza en die andjunk voorsitter en burgemeester van die Vhembe-distrik, Florence Radzilani, betrek.

Limpopo se munisipaliteite het gesamentlik bykans R1,1 miljard in die bank belê.

Die verwagting is dat van die burgemeester uit hul poste verwyder gaan word.

Die ANC in die provinsie het reeds aangedui dat lede wat by die VBS-skandaal betrek word, nie op die party se kandidaatslyste vir die provinsiale en nasionale verkiesings sal wees nie.

ʼn Twee-meterlange kangaroe is by ʼn Australiese reservaat dood

ʼn Twee-meterlange kangaroe is by ʼn Australiese reservaat dood

ʼn Australiese kangaroe-reservaat in Alice Springs is hartseer oor die dood van hul geliefde kangaroe, Roger, wat wêreldwyd bekendheid verwerf het vir sy kolossale grootte en indrukwekkende liggaamsbou.

Roger was 12 jaar oud.

Hy is as jong diertjie gered nadat sy ma in ʼn motorongeluk dood is en het by die reservaat grootgeword.

Hy was twee meter lank en het 89 kilogram geweeg.

In hul huldeblyke het die reservaat se werkers na Roger as hulle “mooi seun” verwys.

Europese hof beslis dat die Verenigde Koninkryk Brexit eensydig kan staak

Europese hof beslis dat die Verenigde Koninkryk Brexit eensydig kan staak

Die Europese Geregshof het beslis dat die Verenigde Koninkryk Brexit kan kanselleer sonder die toestemming van die ander 27 EU-lede.

Die regters sê dit kan gedoen word sonder om die bepalings van Brittanje se lidmaatskap te verander.

Die BBC berig dat ʼn groep politici wat teen Brexit gekant is aangevoer het dat die Verenigde Koninkryk Brexit eensydig kan staak, maar hulle is teengestaan deur die regering en die EU.

Britse LP’s moet môre stem oor die ooreenkoms om die EU te verlaat.

Rassisme oorheers die menseregteskendings wat by die Menseregtekommissie aangemeld word

Rassisme oorheers die menseregteskendings wat by die Menseregtekommissie aangemeld word

Die Suid-Afrikaanse Menseregtekommissie sê die meeste menseregteskendings wat die afgelope vyf jaar aangemeld is, hou verband met ongelykheid insluitend rassisme teenoor swart mense.

Die kommissie het vandag sy jaarverslag in Johannesburg bekend gestel oor die neigings in menseregte-oortredings in Suid-Afrika vir die 2016/2017-boekjaar.

ʼn Senior regsbeampte by die kommissie, Alexandra Fitzgerald, sê hulle het in 2016/2017 altesaam 705 klagtes oor rassisme ontvang teenoor 643 die jaar daarvoor.

Fitzgerald sê die kommissie ervaar ʼn ernstige uitdaging van mense wat nie aan sy aanbevelings voldoen nie…

Frankryk se president skop vas teen die geelfrokkie-betogings

Frankryk se president skop vas teen die geelfrokkie-betogings

Die Franse president, Emmanuel Macron, sal vandag met vakbonde en plaaslike verenigings oor die sogenaamde geel frokkie-betogings vergader.

Byna 2000 mense is Saterdag regoor Frankryk in hegtenis geneem weens voortslepende gewelddadige betogings teen Macron se regering.

Betogers het veral in Parys groot skade aangerig.

Monumente is gevandaliseer en motors en winkels is aan die brand gesteek en geplunder.

Talle betogers is ook beseer toe hulle met die polisie slaags geraak het.

Die Franse minister van Finansies sê die betogings is besig om die ekonomie te knou.

Die president se kantoor het gister bekendgemaak dat Macron binne dae ‘n belangrike aankondiging gaan maak.

Geen verdere besonderhede is egter
bekendgemaak nie.

Maatskappy wat na olie en gas soek in die Vrystaat en KZN kry sterk teenkanting

Maatskappy wat na olie en gas soek in die Vrystaat en KZN kry sterk teenkanting

‘n Maatskappy wat met ‘n proses begin om na gas en olie in KwaZulu-Natal en die Vrystaat te soek, kry sterk teenkanting.

Rhino Oil & Gas Exploration Suid-Afrika se aansoek om eksplorasie-regte oor ‘n gebied van ‘n miljoen hektaar, kry die wind van voor van inwoners en landbougroepe.

Boere en omgewingsgroepe is bekommerd dat die eksplorasie uiteindelik tot hidrobreking sal lei.

Die voorsitter van die Memel-boerevereniginging, Tienie Swanepoel, sê veeboere in die omgewing is afhanklik van grondwater en gaan die aansoek teenstaan.

Eskom sê die nypende tekort aan steenkool gaan nie tot beurtkrag lei nie

Eskom kondig aan dat voorlopig geen beurtkrag vandag nodig is nie

Eskom het kort gelede aangekondig dat beurtkrag voorlopig nie vandag ingestel sal word nie.

Die Eskom woordvoerder, Khulu Phasiwe sê dit volg onder meer omdat sommige kragopwekkingseenhede na instandhoudingswerk weer aanlyn is.

Hy sê egter die kragnetwerk is steeds onder groot druk en die situasie sal hersien word indien daar verdere probleme by kragstasies is.

Suid-Afrikaners het gister vir die eerste keer in dae nié onder beurtkrag deurgeloop nie.

Jeremy Corbyn sê hy is gereed om oormôre oor te neem as Theresa May se Brexit-ooreenkoms verwerp word

Jeremy Corbyn sê hy is gereed om oormôre oor te neem as Theresa May se Brexit-ooreenkoms verwerp word

Die leier van die Britse Arbeidersparty, Jeremy Corbyn, sê hy is gereed om oormôre oor te neem as eersteminister van ʼn minderheidsregering indien die Parlement môre Theresa May se Brexit-ooreenkoms verwerp.

Die opposisie het beloof om onderhandelinge met die Europese Uie te hervat, indien sy verslaan word.

Volgens Sky News kan die stemming gesien word as die hoogtepunt van 18 maande se onderhandelings met Brussel.

May het verlede maand ʼn ooreenkoms met die EU beklink, maar het nou die steun van die LP’s nodig.