Nehawu is gekant ten die privatisering van Necsa

Nehawu is gekant ten die privatisering van Necsa

Die gesondheidswerkersvakbond, Nehawu, sê hy sal die privatisering van die Suid-Afrikaanse Kernenergiekorporasie ten alle koste bestry.

Volgens berigte het die minister van Energie, Jeff Radebe, die hele Necsa-raad afgedank omdat daar planne beraam word om dit aan ʼn Amerikaanse maatskappy te verkoop.

Nehawu sê die wyse en spoed van die afdanking van die raad bevestig die bewerings.

Hy het bygevoeg daar was geen sinvolle rede vir die afdanking en die gevolglike bestuurskrisis nie, aangesien die termyn van die raad oor drie maande verstryk.

Die EFF sê die regering moet hom nie steur aan die ekonomiese raad van die IMF nie

Die EFF sê die regering moet hom nie steur aan die ekonomiese raad van die IMF nie

Die EFF sê die Regering behoort nie enige ekonomiese raad vanaf die Internasionale Monetêre Fonds te aanvaar nie.

Die IMF se besturende direkteur, Christine Lagarde, het gister in Pretoria met president Cyril Ramaphosa en die president van die Reserwebank, Lesetja Kganyago, vergader.

Sy het dit duidelik gestel dat Suid-Afrika nie enige lenings van die instansie soek nie.

Die EFF sê die IMF is volgens ondervinding en geskiedkundig verantwoordelik vir ekonomiese modelle en stelsels wat arm nasies vernietig het en arm mense in verdere armoede gedompel het.

Amptenaar van IMF bevraagteken SA se besluit om gratis tersiêre onderwys aan te bied

Amptenaar van IMF bevraagteken SA se besluit om gratis tersiêre onderwys aan te bied

ʼn Amptenaar van die Internasionale Monetêre Fonds het Suid-Afrika se besluit om gratis tersiêre onderwys aan te bied bevraagteken en is van mening dat meer geld eerder op laerskool- en hoërskoolonderwys bestee moet word.

Die IMF se senior residentverteenwoordiger in Suid-Afrika, Montfort Mlachila, sê die land moet heelwat meer moeite te doen om op die grondbeginsels te konsentreer as op die hoogste vlak.

Volgens City Press sê hy dit is belangrik dat mense wat universiteit toe gaan na wense opgelei is om die uitdagings te trotseer.

Brian Dames bedank uit Eskom se volhoubaarheidstaakspan

Brian Dames bedank uit Eskom se volhoubaarheidstaakspan

Die voormalige uitvoerende hoof van Eskom, Brian Dames, het bedank uit president Cyril Ramaphosa se volhoubaarheidstaakspan wat hom van raad moet bedien om die beleërde diensverskaffer te red.

Die Presidensie sê Dames het sy kommer uitgespreek oor ʼn moontlike botsing van belange ten opsigte van die bestek van die werk en die verwysingsraamwerk van die span.

Dames is tans aan die hoof van Patrice Motsepe se African Rainbow Energy and Power.

Hy sê hy is bereid om die land in ʼn ander hoedanigheid te dien.

ʼn Lasbrief tot inhegtenisname is uitgereik vir Grace Mugabe

ʼn Lasbrief tot inhegtenisname is uitgereik vir Grace Mugabe

Die drukgroep, AfriForum, het aangekondig dat ʼn lasbrief tot inhegtenisname uitgereik is vir Grace Mugabe.

Dié voormalige presidentsvrou van Zimbabwe het na bewering verlede jaar in Augustus die Suid-Afrikaanse model, Gabriella Engels, in ʼn Johannesburgse hotelkamer aangerand.

Die Regering het diplomatieke immuniteit aan Mugabe toegestaan, wat haar die geleentheid gegun het om die land sonder vervolging te verlaat.

In Julie het AfriForum egter ʼn Hooggeregshofaansoek gewen om die Regering se besluit te laat hersien en ter syde te stel.

ʼn Russiese vragskip vlot gemaak nadat dit in Engeland strand

ʼn Russiese vragskip vlot gemaak nadat dit in Engeland strand

ʼn Russiese vragskip is vlot gemaak nadat dit tydens ʼn winterstorm teen ʼn strand in Cornwall, Engeland gestrand het.

Nooddienste is ontplooi om die Kuzma Minin-vragskip by te staan.

The Telegraph berig dat die skip meer as ʼn honderd foute gehad het tydens haar jongste ondersoek en die vaartuig is vir sewe maande in Nederland gehou voordat dit na Verenigde Koninkryk gevaar het.

Die eienaars sê egter onveilige omstandighede het tot die voorval gelei en oorweeg regstappe om die koste van skade aan die skip te herwin.

Kapenaars se waterverbruik steeds op aanvaarbare vlakke

Kapenaars se waterverbruik steeds op aanvaarbare vlakke

Die Kaapstadse metroraad sê die gemiddelde waterverbruik het die afgelope week met 46 miljoen liter tot 587 miljoen liter per dag toegeneem.

Die metroraad sê dit is binne die huidige vlak 3 se gebruik van 650 miljoen liter per dag.

Die vlak van damme wat Kaapstad van water voorsien, het oor die afgelope week met sowat 1%t tot net meer as 68% gedaal.

Dit is teenoor die 33%

in die ooreenstemmende tyd verlede jaar. Die Raad het inwoners en vakansiegangers aangemoedig om steeds water tydens die Feestyd spaarsaam te gebruik.

Protesoptrede in Noordwes kos polisie vanjaar R54 miljoen

Protesoptrede in Noordwes kos polisie vanjaar R54 miljoen

Die minister van polisie, Bheki Cele, sê protesoptrede in Noordwes het sy departement vanjaar R54 miljoen gekos.

Die provinsie het vroeër vanjaar deurgeloop onder ‘n vlaag gewelddadige betogings.

Cele het sy tevredenheid uitgespreek met die wyse waarop die polisie die onstabiliteit in Noordwes hanteer het.

Hy het te kenne gegee dat die polisie nie begroot het vir die uitgawe nie.

Die geld is verkry van ‘n begroting wat bedoel is vir misdaadvoorkoming.

Cele is op ‘n tweedaagse besoek aan Noordwes om te kyk na die polisie se gereedheid vir die feestyd.

Wes-Kaapse ANC veroordeel plaasaanvalle in provinsie

Wes-Kaapse ANC veroordeel plaasaanvalle in provinsie

Die Wes-Kaapse ANC het die vlaag van plaasaanvalle in die provinsie veroordeel en ʼn beroep op die polisie gedoen om sy intelligensie-operasies te verskerp teen diegene wat die aanvalle uitvoer.

Die provinsiale sekretaris, Faiez Jacobs, sê elke aanval op die landbougemeenskap is ʼn aanval op die land en voedselsekerheid.

News24 berig dat hy sy woede te kenne gegee het ná die moord op ʼn plaaswerker deur verskeie mans wat die naweek ʼn plaas in Philippi, Kaapstad beroof het asook die moord op die Steyn-egpaar naby Bonnievale verlede week.

Ferrari beplan ʼn Michael Schumacher-uitstalling volgende maand op sy vyftigste verjaarsdag

Ferrari beplan ʼn Michael Schumacher-uitstalling volgende maand op sy vyftigste verjaarsdag

Ferrari beplan om volgende maand ʼn Michael Schumacher-uitstalling by hul hoofkantoor aan te bied op die voormalige kampioen se 50ste verjaarsdag.

Die Duitser het vyf van sy sewe Wêreldkampioenskapstitels by die Italiaanse span verower, voordat hy in 2012 uitgetree het.

Schumacher het ernstige kopbeserings opgedoen tydens ʼn ski-ongeluk vyf jaar gelede en is nog nie weer in die openbaar gesien nie.

Die BBC berig dat die uitstalling by die Ferrari-museum in Maranello op 3 Januarie sal open.