Die organisasie Wapenvrye Suid-Afrika, het die Parlement se goedkeuring verwelkom van ʼn periode vir ʼn vuurwapen-amnestie wat volgende Sondag begin

Die organisasie Wapenvrye Suid-Afrika, het die Parlement se goedkeuring verwelkom van ʼn periode vir ʼn vuurwapen-amnestie wat volgende Sondag begin.

Die vorige amnestieperiodes in 2005 en 2010 was geslaagd met die herwinning van ongevraagde en onwettige vuurwapens.

Sedert 2017/18 het burgers gemiddeld 24 wapens per dag as gesteel of verlore aangemeld, terwyl polisielede een wapen per dag verloor het.

ʼn Direkteur van die organisasie, Adéle Kirsten, sê hul doel oor die lang termyn is om vuurwapens heeltemal te verban.

Die personeel van die Suid-Afrikaanse Lugdiens het gister net die helfte van hul salarisse ontvang

Die personeel van die Suid-Afrikaanse Lugdiens het gister net die helfte van hul salarisse ontvang, terwyl die beleërde lugdiens belowe het om die res Maandag te betaal.

Dit volg ná laasweek se staking wat die SAL nagenoeg R50-miljoen per dag gekos het.

Dié tekort word daaraan toegeskryf dat die lugdiens nog nie die regering se reddingsboei ten bedrae van twee miljard Rand ontvang het nie.

Die metaalwerkersvakbond, Numsa, het die omstandighede as teleurstellend bestempel.

Eerste Nasionale Bank verwag dat die waarde van saketransaksies môre op Swart Vrydag met 16% sal styg

Eerste Nasionale Bank verwag dat die waarde van saketransaksies môre op Swart Vrydag met 16% sal styg.

Laasjaar het sy debiet- en kredietkaarthouers aankope van meer as R2,5-miljard gedoen.

ENB se kleinhandelshoofbestuurder, Raj Makanjee, het verbruikers gemaan dat Swart Vrydag die begin is van ‘n baie lang feesseisoen en dis belangrik dat hulle ordentlik beplan en begroot vir aankope.

Intussen het die SA Kommunisteparty in die Vrystaat die werkersklas aangemoedig om wat hy bestempel as Swart Vrydag se growwe verbruikersdruk te verwerp.

Die munisipaliteit van Oudtshoorn stel ondersoek in oor hoe ʼn gewone DA-raadslid vir meer as ʼn jaar die salaris van ʼn burgermeesterskomiteelid ontvang het

Die munisipaliteit van Oudtshoorn in die Klein Karoo stel ondersoek in na hoe dit gebeur het dat ʼn gewone DA-raadslid vir meer as ʼn jaar die salaris van ʼn burgermeesterskomiteelid ontvang het.

Marcellis Theyse het ná die tussenverkiesing in Mei verlede jaar ʼn wyksraadslid geword.

Die Weekend Argus berig dat die ANC in die raad wil weet hoe dit moontlik is dat die fout vir so lank begaan is voordat iemand daarvan uitgevind het.

Die DA sê hy het slegs laasmaand van die probleem bewus geraak.

Die SAUK het berigte ten sterkste ontken dat hy die Staatsveiligheidsagentskap se dienste wil gebruik om op sy werknemers te spioeneer.

Die SAUK het berigte ten sterkste ontken dat hy die Staatsveiligheidsagentskap se dienste wil gebruik om op sy werknemers te spioeneer.

Die Sunday Times berig dit het vroeër die maand uit ʼn spesiale vergadering op die lappe gekom toe die korporasie se raad voorgestel het dat die uitlek van gevoelige inligting bestuur moet word.

Die SAUK het luidens ʼn verklaring gesê die berig is geheel en al onwaar en hy is bekommerd dat die koerant vertroulike raadsnotules gebruik het om inligting doelbewus te verdraai en sensasioneel voor te stel.

Die uitsaaier sê dit het paniek veroorsaak en gelei tot ʼn vertrouensbreuk tussen die SAUK-raad en die personeel.

ʼn Vrou van Durban wil hê dat ʼn man uit die tronk vrygelaat moet word nadat sy vroeër beweer het dat hy haar verkrag het

ʼn Vrou van Durban wil hê dat ʼn man uit die tronk vrygelaat moet word nadat sy vroeër beweer het dat hy haar verkrag het.

Die 42-jarige vrou sê sy het die identiteit van Wonderboy Shandu verwar met dié van ʼn ander man wat haar verkrag het.

Die voorval het in 2008 in Inanda plaasgevind en Shandu is twee jaar later tot lewenslange tronkstraf gevonnis.

Die vrou het met die Trust vir Geregtigheid vir Gevangenes en Aangehoudenes geskakel om haar te help met haar pleidooi.

Die verbruikersprys-inflasiekoers val tot sy laagste vlak sedert 2011

Statistiek Suid-Afrika sê die jaarlikse verbruikersprys-inflasiekoers het in Oktober tot sy laagste vlak gedaal in meer as agt jaar.

Dit is 3,7% teenoor 4,1% in September.

Dit val binne die Reserwebank se inflasiedoelwit van 3% tot 6%.

Marika Bennett van Statistiek SA sê pryse het oor die algemeen onveranderd gebly vanaf September tot Oktober.

Die aanrandingsaak teen Julius Malema en Mbuyiseni Ndlozi word uitgestel

Die Randburgse Landdroshof in Gauteng het die aanrandingsaak teen die EFF-leier, Julius Malema, en die partywoordvoerder, Mbuyiseni Ndlozi, tot Maart aanstaande jaar uitgestel vir verhoor.

Die twee word daarvan aangekla dat hulle laasjaar ʼn polisieoffisier aangerand het tydens die begrafnis van die ANC-veteraan, Winnie Madikizela-Mandela. Die beweerde aanval is op geslotekringtelevisie
opgeneem.

Die Nasionale Vervolgingsgesag se besluit om vervolging in te stel volg ná volgehoue druk deur AfriForum.

Kallie Kriel van die drukgroep sê hulle is bly Malema en Ndlozi gaan tereg staan.

Pravin Gordhan sê daar is nie meer geld beskikbaar om die SAL te help nie

Die Minister van Openbare Ondernemings, Pravin Gordhan, sê die staatskas is nie in staat om verdere finansiële steun aan die Suid-Afrikaanse Lugdiens te verleen nie.

Die regering het die afgelope drie jaar finansiële steun ten bedrae van meer as R20,5-miljard vir die beleërde lugdiens bewillig.

Salarisonderhandelings tussen die metaalwerkersvakbond, Numsa, die Suid-Afrikaanse Kajuitpersoneelvereniging en die SAL het ʼn dooiepunt bereik aangesien daar nie tot ʼn vergelyk gekom kon word oor die werknemers se eis van 8% nie.

Gordhan sê die staking verswak die lugdiens se finansiële posisie verder.

Intussen het die Numsa-woordvoerder, Phakamile Hlubi-Majola, die lugdiens van verwaandheid beskuldig nadat hy die verhogingsaanbod van 6,5% wat hy gister gemaak het, teruggetrek het.

Volgens Hlubi-Majola het die vakbond ʼn tweede stakingskennisgewing by die maatskappy Air Chefs ingedien.

Die Nelson Mandela-stigting het sy aansoek in die Grondwethof teen Ernst Roets van AfriForum verloor

Die Nelson Mandela-stigting het sy aansoek in die Grondwethof teen Ernst Roets van AfriForum verloor.

Die stigting het appèl aangeteken in die land se hoogste hof ná die Gelykheidshof se beslissing dat sy Twitter-boodskap, wat die ou nasionale vlag
bevat, nie minagting van die hof is nie.

Dit het gevolg kort nadat dieselfde hof bevind het dat die ongemotiveerde vertoning van die vlag haatspraak is.

Die stigting het in die Grondwethof aangevoer dat Roets die waardigheid van howe aangetas het.