Kodeïn-medisyne binnekort op ʼn hoër skedule

Die Suid-Afrikaanse Reguleerder van Gesondheidsprodukte oorweeg dit om kodeïn-medisyne op ʼn hoër skedule te plaas.

Medisyne wat kodeïn bevat soos Adco-dol en Nurofen Plus, is tans as skedule-2 medisyne oor die toonbank beskikbaar.

In die toekoms sal verbruikers ʼn voorskrif van ʼn dokter moet verkry vir hierdie en ander medisyne wat kodeïne bevat.

Mlungisi Wondo van die reguleerder sê produkte wat kodeïn bevat word algemeen misbruik.

Investec verkoop twee winkelsentrums om die geld in Europa te belê

Die Investec Eiendomsfonds het aangekondig dat hy beplan om al sy aandele in winkelsentrums in Limpopo en Noordwes te verkoop met die oog daarop om die geld in Europa te belê.

Die maatskappy wil die Musina-winkelsentrum in Musina en die Boitekong-winkelsentrum in Rustenburg vir ʼn gesamentlike bedrag van R727-miljoen
van die hand sit.

Fin24 berig dat Investec onlangs twee Belgiese logistieke eiendomme teen R1,1-miljard aangeskaf het.

Die afhandeling van die transaksie moet nog deur die Mededingingskommissie goedgekeur word.

Afriforum jeug eis optrede van UV-Bestuur oor betogings

Afriforum Jeug het gister ‘n skrywe aan die Universiteit van die Vrystaat se Dekaan van studentesake en bestuur gerig om in te gryp nadat betogings die 2020 registrasieproses deurentyd ontwrig.

Lede van die South African Students congress en EFF-studenteleiers betoog al sedert verlede week, en personeel wat die registrasieproses moet hanteer word na bewering geintimideer.

Afriforum jeug dring aan dat die UV bestuur voorsorgmaatreëls tref om studente en personeel se veiligheid te verseker en sê dat daar al vele vergaderings met die UV-bestuur gehou is oor hierdie kwessie.

Drie Sjinese stede is van die buitewêreld afgesluit in ʼn poging om die verspreiding van die dodelike korona-virus wat reeds 18 lewens geëis het, in bedwang te hou

Drie Sjinese stede is van die buitewêreld afgesluit in ʼn poging om die verspreiding van die dodelike korona-virus wat reeds 18 lewens geëis het, in bedwang te hou.

Die Wêreld Gesondheidsorganisasie oorweeg ook om ʼn wêreldwye gesondheidsnoodtoetstand af te kondig nadat meer as 600 gevalle in Sjina en verskeie ander lande aangemeld is.

Sky News berig dat die dood van ʼn 80-jarige die eerste bevestigde sterfgeval buite die Hubei-provinsie is waar die uitbraak begin het.

Intussen word verskeie mense in Brittanje getoets om vas te stel of hulle die dodelike virus opgedoen het.

Drie mense word tans in Skotland getoets, maar nog nie een geval van die siekte is bevestig nie.

Die Padverkeersbestuurkorporasie het ʼn spoedvraat gevra om by die polisie aan te meld nadat hy teen meer as 300 kilometer per uur jaag

Die Padverkeersbestuurkorporasie het ʼn spoedvraat gevra om by die polisie aan te meld nadat ʼn video van ʼn motorvoertuig wat teen meer as 300 kilometer per uur jaag die ronde begin gedoen het.

Die korporasie sê in ʼn Twitter-boodskap hy weet wie die motoris is en het sy of haar adres in Midrand.

Die Minister van Vervoer, Fikile Mbalula, het aan die media gesê die polisie is op die bestuurder se spoor.

Die voertuig is glo ʼn Audi TTS.

Die video is blykbaar op die N-1-snelweg in Johannesburg opgeneem.

Die Suid-Kaapse owerhede het naby Mosselbaai op wrakstukke afgekom, terwyl hulle besig was om na ʼn vermiste vliegtuig te soek

Die Suid-Kaapse owerhede het naby Mosselbaai op wrakstukke afgekom, terwyl hulle besig was om na ʼn vermiste vliegtuig te soek.

Die straler van die Suid-Afrikaanse Burgerlugvaartowerheid het vermis geraak nadat dit gisteroggend met drie mense aan boord van die George-lughawe opgestyg het.

Die bemanning van ʼn Weermag-helikopter het die wrakstukke tussen Mosselbaai en Grootbrakrivier opgemerk.

Die twee mans en ‘n vrou aan boord van die inspeksievliegtuig was op ʼn vlug-kalibreringsending om die lughawe se navigasiehulpmiddels na te gaan.

Eskom het aangedui dat daar ‘n groot moontlikheid is dat beurtkrag vandag op kort kennisgewing ingestel kan word

Eskom het aangedui dat daar ‘n groot moontlikheid is dat beurtkrag vandag op kort kennisgewing ingestel kan word.

Die kragverskaffer het gisteraand laat ‘n verklaring uitgestuur waarin hy beklemtoon dat hy elke bietjie uit al sy opwekking-sisteme moes wurg om te verhoed dat beurtkrag gister ingestel word.

Die kragverskaffer het gisteraand reeds teen ‘n verlies van meer as 13 000 megawatt krag gelewer.

Eskom beklemtoon dat hy steeds alles moontlik in sy vermoë doen om beurtkrag vir vandag af te weer.

Die Regshulpsentrum beplan om die Suid-Afrikaanse Nasionale Weermag se kleredragregulasies in die hof te toets

Die Regshulpsentrum beplan om die Suid-Afrikaanse Nasionale Weermag se kleredragregulasies in die hof te toets nadat die aanklag teen ʼn Moslem-lid wat ʼn kopdoek onder haar baret gedra het, teruggetrek is.

Die sentrum beskryf die SANW se besluit as ʼn gedeeltelike oorwinning, maar sê die volgende stap is om die regulasies in die hof te toets.

Majoor Fatima Isaacs is laasjaar aangekla van die opsetlike oortreding van die regulasies.

Die Minister van Verdediging, Nosiviwe Mapisa-Nqakula, sê sy is tevrede dat die saak teruggetrek is.

Die DA het ʼn beroep gedoen dat die Regterpresident van die Wes-Kaapse Hooggeregshof, John Hlophe, onmiddellik geskors word

Die DA het ʼn beroep gedoen dat die Regterpresident van die Wes-Kaapse Hooggeregshof, John Hlophe, onmiddellik geskors word.

Dit volg nadat die Adjunkregterpresident, Patricia Goliath, ʼn amptelike klag teen Hlope ingedien het en hom beskuldig het van growwe nalatigheid, familiebegunstiging en magsmisbruik.

Die tussentydse DA-leier, John Steenhuisen, sê die jongste bewerings moet vinnig ondersoek word, sodat betaamlikheid, respek en die oppergesag van die reg in die Wes-Kaapse Hooggeregshof herstel kan word.

AfriForum het ʼn amptelike klag teen president Cyril Ramaphosa en minister Lindiwe Sisulu by die VN ingedien

AfriForum het ʼn amptelike klag ingedien teen president Cyril Ramaphosa en minister Lindiwe Sisulu by die Verenigde Nasies se Spesiale Rapporteur oor die Omstandighede van die Verdedigers van Menseregte.

Die minderheidsdrukgroep sê dit het sy oorsprong in ʼn uitspraak deur Ramaphosa oor plaasmoorde en grondbesettings tydens ʼn besoek aan die Verenigde State in September 2018.

Ernst Roets van AfriForum sê plaasmoorde en grondbesettings is ernstige skendings van menseregte wat deur alle invloedryke betrokkenes en regerings wêreldwyd veroordeel moet word.