Die Speaker van die Nasionale Vergadering tevrede dat die DA se nuwe mosie vir die instel van verrigtinge om die OB uit haar amp te verwyder aan Huisreëls voldoen

Die Speaker van die Nasionale Vergadering, Thandi Modise, is tevrede dat die DA se nuwe mosie vir die instel van verrigtinge om die Openbare Beskermer uit haar amp te verwyder aan die Huisreëls voldoen.

Sy het alle politieke partye genooi om geskikte mense te benoem om op die paneel van kenners te dien.

Die spertyd is volgende Vrydag.

Die DA sê hy het sy oorspronklike mosie wat in Desember ingedien is, onttrek toe nuwe getuienis aan die lig gekom het wat die party se saak teen Busisiwe Mkhwebane versterk.

Die VF-plus het die tweede plaasaanval in een week in die Vrystaat streng veroordeel

Die VF-plus het die tweede plaasaanval in een week in die Vrystaat streng veroordeel.

Japie van den Berg is vroeër op sy plaas Hillbrow op Vierfontein aangeval.

‘n Familielid van Van den Berg is onlangs wreedaardig aangeval op ‘n plaas naby Wesselsbron deur ‘n persoon wat op borgtog was.

Sover bekend is niemand nog in hegtenis geneem nie.

Die VF-plus sê die uitroepe na landelike beveiliging val op dowe ore en sê dat behoorlike strafmaatreëls in plek gestel moet word.

Die korona-virus het Suid-Amerika bereik

Die korona-virus het Suid-Amerika bereik, waar die eerste geval van die siekte in Sao Paulo, Brasilië, bevestig is.

Dit beteken dat dié dodelike virus nou op elke vasteland behalwe Antarktika gediagnoseer is.

Die jongste bevestiging volg nadat Brasiliane teruggevlieg is van die stad Wuhan in China, waar die virus in Desember uitgebreek het.

Griekeland het vroeër sy eerste geval bevestig, terwyl Frankryk sy eerste sterfte as gevolg van die virus aangeteken het.

Botswana se regering het erken dat minstens 46 renosters die afgelope tien maande in die land gestroop is

Botswana se regering het erken dat minstens 46 renosters die afgelope tien maande in die land gestroop is.

Die toename in stropery het in die Moremi-natuurreservaat in die noorde voorgekom.

AFP berig dat die syfer byna 10% van Botswana se algehele renoster-bevolking verteenwoordig.

Die beskermde spesie is nie deel van die regering se onlangse besluit om ‘n verbod van vyf jaar op die uitreik van lisensies vir trofeejag op te hef nie

Die eerste fase van openbare verhore oor die NVG word afgehandel

Die Parlement se portefeuljekomitee op Gesondheid het die eerste fase van openbare deelname aan die Wetsontwerp op Nasionale Gesondheidsversekering afgehandel.

Dit het uitgebreide openbare verhore in al nege provinsies ingesluit.

Die komitee sê hoewel die meerderheid mense die wetsontwerp goedkeur en versoek dat dit onmiddellik ingestel word, is daar ook mense wat heftig daarteen gekant is.

Dit is hoofsaaklik as gevolg van die dubbelsinnigheid ten opsigte van die finansieringsmodel, ‘n kwynende inkomstebasis en die kommer oor die fonds se bestuur as gevolg van korrupsie.

Eis van R156 miljoen teen die gewese voorsitter van die Suid-Afrikaanse Lugdiens ingedien

Die forensiese konsultant Paul O’Sullivan het ‘n eis van R156 miljoen teen die gewese voorsitter van die Suid-Afrikaanse Lugdiens, Dudu Myeni, en verskeie ander partye ingedien.

‘n Balju het die dokumente vandag by die Hooggeregshof in Pretoria op haar bedien waar die organisasie teen Belastingmisbruik, Outa, en die SAL se Vlieëniersvereniging aansoek doen om haar tot misdadige direkteur verklaar te kry.

eNCA berig dat O’Sullivan Myeni daarvan beskuldig dat sy aanspreeklikheid probeer ontwyk tydens haar getuienis.

Befondsingsprobleme by Statistieke Suid-Afrika onder die loep

Die minister in die presidensie, Jackson Mthembu, sê daar moet dringend ’n blywende oplossing gevind word vir die befondsings-uitdagings by Statistieke Suid-Afrika.

Hy het met die statistikus-generaal, Risenga Maluleke, en lede van Statistieke Suid-Afrika se raad vergader nadat raadslede gedreig het om weens ’n
gebrek aan fondse by die instelling te bedank.

Mthembu sê hulle sal saam met die Nasionale Tesourie werk om moontlike risiko’s in die stelsel te hanteer indien befondsings-uitdagings nie aangespreek word nie.

’n Lasbrief is uitgereik vir die inhegtenisneming van Julius Malema

Die Oos-Londense landdroshof het ‘n bevel uitgereik vir die arrestasie van EFF-leier Julius Malema nadat hy versuim het om vandag in die hof te verskyn.

Die lasbrief is egter tot die agtste Mei opgeskort.

Hy staan tereg op vyf aanklagte wat verband hou met bewerings dat hy ‘n vuurwapen onwettig in die openbaar afgevuur het tydens die EFF se vyfde verjaardagvieringe in Mdantsane.

Die staat sal na verwagting vandag die videogreep van die voorval aan die verdediging oorhandig.

Plaasaanval: Die bekende Vrystaatse boer, Mimie Jacobs, herstel in ‘n Bloemfonteinse hospitaal

Die Vrystaat se Vroueboer van die Jaar vir 2016 herstel tans in die hospitaal nadat sy ernstig beseer is in ’n plaasaanval.

Mimie Jacobs is die naweek deur drie mans oorrompel wat in haar huis buite Mangaung ingebreek het.

Hulle het gedreig om haar te verkrag en te vermoor en gedwing om geld oor te plaas.

Hulle het haar in die kop gesteek en vasgebind voordat hulle gevlug het.

Jacobs kon later daarin slaag om haarself los te maak en het op ’n buurplaas gaan hulp soek.

Diamond Princess: “Die kwarantyn-maatreëls was belaglik”

‘n Britse man wat die korona-virus tydens sy wittebrood op die plesierboot Diamond Princess in Japan opgedoen het, sê die kwarantyn-maatreëls op die vaartuig was belaglik.

Die 58-jarige Alan Steele is twee weke lank in ‘n hospitaal in Tokio afgesonder terwyl sy bruid op die skip moes agterbly.

Meer as 600 mense op die skip is mettertyd met die virus gediagnoseer.

Sky News berig dat Steele sê hoewel die passassiers nie buite hulle kajuite toegelaat is nie, kon die personeel tog vryelik rondbeweeg.