Die speaker van die Nelson Mandelabaai-raad, Buyelwa Mafaya, het vandag se mosie van wantroue in die burgemeester, Mongameli Bobani, ter elfder ure teruggetrek.

Raadslede sê hulle is vroeg vanoggend in kennis gestel van die besluit.

Mafaya sê die polisie het haar gewaarsku dat betogings ʼn sekerheidsgevaar kan inhou.

The Herald berig dat raadslede van die United Front wat Bobani steun, onderneem het dat die bloed sal vloei indien die mosie aanvaar word.

Die Boelgaarse polisie het ses ondersteuners van die nasionale span in hegtenis geneem nadat Maandag se Euro 2020 kwalifiserende wedstryd teen Engeland in die hoofstad Sofia, twee keer gestaak moes word weens rassisme.

Die owerhede het voorts nog nege verdagtes geïdentifiseer wat betrokke was by rassistiese uitjouery, die namaak van aapgeluide en die gebruik van die Nazi-saluut.

Die voorsitter van Boelgarye se sokkerliggaam het reeds bedank, terwyl die Europese beheerliggaam, Uefa, asook die Engelse Sokkervereniging klagtes ingedien het.

Engeland het die wedstryd met 6-0 gewen.

Die DA-leier, Mmusi Maimane het President Cyril Ramaphosa versoek om skriftelik te bevestig dat die staat nié sy voorganger, Jacob Zuma se regsonkostes gaan betaal nie.

Hy het gereageer nadat Zuma aangedui het dat hy aansoek gaan doen om verlof tot appèl teen ‘n hofbeslissing oor sy vervolging.

Die Hooggeregshof in Pietermartzburg het Vrydag, Zuma en die wapenvervaardiger, Thales se aansoek geweier om vervolging teen hulle te staak.

Die hof het gister beslis dat Zuma se verhoor op aanklagte van korrupsie en rampokkery op 4 Februarie volgende jaar sal begin, hangende die uitslag van sy appèlaansoek.

Die aanklagte hou verband met die destydse wapentransaksie.

Die saak van die vermeende moordenaar van ʼn Johannesburgse student sal na die Hooggeregshof in die stad oorgeplaas word wanneer hy volgende week weer voorkom.

Dumisani Mkhwanazi word aangekla van die moord op die 19-jarige Palesa Madiba in 2013.

Sy het vermis geraak toe sy tydens die Vrouedagnaweek in Augustus daardie jaar by ʼn vriendin in Soweto gaan kuier het.

Haar liggaam is in ʼn vlak graf gevind.

Madiba se vriendin het nou ingestem om vir die staat te getuig teen Mkhwanazi, wat haar oom is.

Die metaalwerkersvakbond, Numsa, sê hy is teleurgesteld dat daar nog nie ʼn enkele toegewing gemaak is nie, sedert die begin van onderhandelings in Julie met die voertuigbedryf se onderhandelingsraad.

Die vakbond het werkgewers se salarisaanbod van 1,5% vir die eerste jaar en 5,5% vir die tweede en derde jaar verwerp.

Phakamile Hlubi-Majola van Numsa sê terwyl die deur steeds oop is vir onderhandelings, kan dit slegs gebeur indien die werkgewers hul posisie ingrypend verander