Die waterprobleme wat Bloemfonteiners tans in sommige woonbuurte ervaar, behoort van korte duur te wees

Die waterprobleme wat Bloemfonteiners tans in sommige woonbuurte ervaar, behoort van korte duur te wees.

Rosestad Nuus het verneem dat ‘n elektriese transformator foutief is en tans deur Eskom herstel word.

Gevolglik word min water gepomp vanaf die Welbedacht-dam na die resevoir by Brandkop.

Om tans aan die vraag na water te voldoen, word meer water vanaf Rustfontein-dam na die resevoir herlei.

Dit is nog onbekend hoe lank die herstelwerk gaan duur, maar die verwagting is dat dit later vandag voltooi behoort te wees.

Inwoners word intussen gevra om steeds water spaarsaam te gebruik.

Bloemfonteiners sit vir minstens vandag nog sonder water

Bloemfonteiners gaan vir minstens die res van vandag nog met waterprobleme sit.

Rosestad Nuus het verneem dat die Mangaung-metro sy regspan opdrag gegee het om ‘n teen-appèl teen Bloemwater se appèl te bring.

Dit sal om vier-uur vanmiddag eers in die hof dien, waarna daar meer duidelikheid sal wees oor wanneer die waterlewering gaan verbeter.

Bloemwater het sedert gister waterlewering verminder na net 30% omdat die metro nie ‘n betalingsooreenkoms nagekom het nie.

Die Bloemfonteinse hooggeregshof het verlede week beslis dat watertoevoer nie verminder mag word na 30% nie, maar Bloemwater het egter appèl aangeteken en watertoevoer verminder.

Die Hooggeregshof in Bloemfontein het die Mangaung Metro bloedneus gegee rakende sy skielike besluit om skole se water af te sny

Die Hooggeregshof in Bloemfontein het die Mangaung Metro bloedneus gegee rakende sy skielike besluit om skole se water af te sny.

Die hof het die metro gelas om onmiddellik die watertoevoer na sowat 100 skole in die gebied te herstel.

Die Metro het verlede maand die water afgesny, omdat die skole hulle geld skuld.

Die skole se agterstallige skuld aan die munisipaliteit beloop sowat R70 miljoen.

Die Vrystaatse onderwysdepartement het ‘n dringende aansoek by die hof ingedien om die Metro te dwing om die water weer aan te sluit.

Die departement het die hofbevel verwelkom.

Die polisie-helikopter wat onder geweervuur van transitorowers op die N8 buite die stad deurgeloop het, was die polisie in Bloemfontein se laaste werkende helikopter

Die polisie-helikopter wat Dinsdag onder geweervuur van transitorowers op die N8 buite die stad deurgeloop het, was die polisie in Bloemfontein se laaste werkende helikopter.

Netwerk24 berig die helikopter is gisteroggend agter op ’n vragmotor deur die Rosestad se strate na die Tempe-lughawe buite die stad gebring.

Die helikopter, wat onontbeerlik is vir die bestryding van misdaad in die streek, was die lugvleuel se enigste werkende helikopter nadat die ander een vroeër vanjaar in ’n storm beskadig is.

Brig. Vish Naidoo, nasionale polisiewoordvoerder, sê hy kan nie kommentaar lewer oor die skade aan die helikopter en hoe lank die herstelproses sal duur nie.

Die ondersoek rakende ‘n Pierneef-skildery wat uit die voormalige Vrystaatse premier, Ace Magashule, se kantoor weggeraak het, aan die NVG oorhandig

Die Valke het bevestig dat hulle ondersoek afgehandel en aan die Nasionale Vervolgingsgesag oorhandig is rakende ‘n Pierneef-skildery wat uit die voormalige Vrystaatse premier, Ace Magashule, se kantoor weggeraak het.

Die kunswerk, ter waarde van R8 miljoen, is verlede jaar glo uit Magashule, deesdae sekretaris-generaal van die ANC, se kantoor gesteel.

Bewerings doen sedertdien die rondte dat Magashule by die verdwyning van die skildery betrokke is of dat hy dit glo vir ‘n werknemer persent gegee het.

Volgens die NVG is geen inhegtenis-nemings tot dusver gemaak nie en besluit hulle tans of verdere vervolging nodig is.

Die N8 op pad na die Bram Fischer-lughawe is steeds gesluit nadat ‘n transito-rooftog vanoggend plaasgevind het,

Die N8 op pad na die Bram Fischer-lughawe is steeds gesluit nadat ‘n transito-rooftog vanoggend plaasgevind het.

Owerhede is op die toneel en is steeds besig met opruimingswerk nadat die aanvallers met aanvalsgewere en vermoedelik plofstof op een van G4S se geldwaens toegeslaan het.

Na afloop van ‘n oor-en-weer-skietery is vier mense beseer, terwyl ‘n polisie-helikopter ook glo raakgeskiet is en glo in ‘n nabygeleë veld moes land.

Die rowers het in ‘n Ford Ranger-bakkie en ‘n Audi gevlug.

Die kragonderbreking by die Skougronde hier in die stad kan ‘n halwe dag neem om herstel te word

Die kragonderbreking by die Skougronde hier in die stad kan ‘n halwe dag neem om herstel te word.

Rosestad Nuus het verneem dat ‘n kragverspreider by ‘n substasie onklaar geraak het en dat dit minstens tot middagete vandag gaan neem om te herstel.

Areas wat deur die kragonderbreking geraak word, sluit in Nasionale Hospitaal, Pasteur Hospitaal en Oranje Hospitaal sowel as die woonbuurte Generaal de Wet, Wilgehof, Hospitaalpark en gedeeltes van Oranjesig, Fichardpark, Erlichpark en Willows.

Bloemfonteinse laerskool het weer water na hofbevel

Die laerskool Fichardtpark in Bloemfontein het weer water nadat die Mangaung-metro deur middel van ‘n tussentydse hofbevel gedwing is om die skool se krane weer oop te draai.

Netwerk24 berig dat diè skool een van meer as 92 skole is in die bedieningsgebied van die metro waarvan die watertoevoer weens munisipale skuld afgesny is in die laaste week.

Volgens Netwerk24 is die waterrekening tot op datum betaal, maar die erfbelasting is agterstallig.

Jaco Deacon, van die Federasie van Beheerliggaame van Suid-Afrikaanse skole, en voorsitter van die skool se beheerliggaam sê, die erf waarop die skool geleë is behoort aan die Vrystaatse departement van openbare werke, en is diè departement verantwoordelik vir die erfbelasting.

Die hofbevel is van krag tot 07 Oktober wanneer die skool en sy beheerliggaam gaan aansoek doen dat die besluit ter syde gestel word.

Die Mangaung-metro se verslegtende geldelike situasie is die rede waarom die metro deur Moody’s afgegradeer is

Die Mangaung-metro se verslegtende geldelike situasie is die rede waarom die metro deur Moody’s afgegradeer is.

Netwerk24 berig Mangaung is met drie kerwe deur die internasionale kredietgradeerder afgradeer nadat sy geldelike verknorsing verdiep het.

Mangaung bestaan uit die munisipaliteite van Bloemfontein, Botshabelo, Thaba Nchu, Dewetsdorp, Wepener, Van Stadensrus en Soutpan.

Sowel die DA as die VF Plus en die EFF het gister gesê dié afgradering, die uiteinde van die hersiening van die gradering wat 2 Mei begin het, is geen verrassing nie.

Die voorlopige resultate vir 2019 toon dat Mangaung se kontant tot R131 miljoen van R289 miljoen in 2018 gedaal het.

Die verdagte wat ’n stuk van sy tong verloor het toe hy glo ’n jong vroulike dokter in die Pelonomi-hospitaal probeer verkrag het, is vir sielkundige waarneming verwys

Die verdagte wat ’n stuk van sy tong verloor het toe hy glo ’n jong vroulike dokter in die Pelonomi-hospitaal probeer verkrag het, is vir 30 dae sielkundige waarneming verwys.

Netwerk24 berig die 30-jarige man het gister in die landdroshof in Bloemfontein verskyn.

In ’n verslag ná ’n kort sielkundige evaluering wat by die hof ingedien is, is aanbeveel dat hy vir ’n langer tydperk onder waarneming geneem moet word.

Hy is verwys na die Vrystaatse Psigiatriese Kompleks in Bloemfontein vir waarneming.

Hy moet in September in die hof verskyn wanneer ’n verslag oor hom voorgelê word en oor verdere vervolging besluit sal word.