Die president van Oekraïne, Volodymyr Zelenski, sê hulle is gereed om saam met Suid-Afrika aan verskeie projekte te werk.

Zelenski het Donderdag die media, via ‘n tolk, toegespreek ná sy ontmoeting met president Cyril Ramaphosa by die Uniegebou in Pretoria.

Die Oekraïense leier is in die land om maniere te bespreek om bilaterale samewerking tussen die twee lande uit te brei.

Zelenski sê Oekraïne is gereed om Suid-Afrika ‘n gesamentlike mineraalsentrum te bied.

Intussen berig SABC-nuus Ramaphosa het kort voor die vergadering op sosiale media aangekondig dat hy met die Amerikaanse president, Donald Trump, gepraat het oor die vredesproses in Oekraïne.

Volgens Ramaphosa het hy en Trump saamgestem dat die oorlog so gou as moontlik beëindig moet word om ‘n einde te bring aan onnodige sterftes.