Die farmaseutiese maatskappy Adcock Ingram Beperk herroep ‘n lot Panado Pediatriese alkoholvrye druiwe-gegeurde stroop in Suid-Afrika.

News24 berig die herroeping is weens neerslag wat in die aktiewe bestanddeel, parasetamol, waargeneem is.

Dit beteken die produk voldoen nie aan die visuele beskrywing nie.

Volgens die maatskappy se mediese direkteur, Dr Thiruvasan Govindsamy, raak die herroeping 50ml- en 100ml-produkte met vervaldatums in Julie 2025, Februarie en April 2026.

Die herroeping word as Klas III geklassifiseer, wat die minste risiko vir pasiënte inhou.

Die maatskappy het beperkte gevalle van parasetamol-neerslag opgemerk, maar daar is ooreengekom dat dit minimale veiligheidskwessies inhou.

Pasiënte hoef nie enige newe-effekte te verwag nie.