Agt verdagtes het die gevare van hul kriminele werk ervaar toe hulle nie net verhinder is om die winkel te beroof waarheen hulle op pad was nie, maar ook hul lewens verloor het in ‘n skietgeveg met die polisie in Richardsbaai.

Nuusflits berig die eienaar van die beweerde teiken, ‘n buitelander, het die rooftog vrygespring.

Dit het gebeur nadat inligting oor ‘n transitorooftog die polisie se aandag op die verdagtes en hul voertuig gevestig het.

Die voertuig is in Richardsbaai opgemerk, maar toe die verdagtes weier om te stop nadat die polisie hulle probeer aanhou het, het ‘n hoëspoedjaagtog en skietery gevolg.

Na die noodlottige insident het die polisie beslag gelê op vuurwapens en toerusting wat gebruik word om in huise in te breek.