Universiteit van die Vrystaat (UV)-student, Pfarelo Maphangula, is by die Youth Legacy Excellence-toekennings vir uitstaande gemeenskapsdiens erken.

Die toekennings, gehou by die Alberton Burgersentrum in die suidelike deel van die Oos-Rand, gee erkenning aan uitsonderlike jeug in kategorieë soos Kuns en Kultuur, Gesondheid, Filantropie, Wetenskap en Sport.

Een van die projekte wat Maphangula se grootste bron van trots is, is die ‘Instilling Innovative Mindsets in the Society’-projek. Die projek fokus daarop om onderwys te verbeter deur jongmense rekenaargeletterdheidsvaardighede en webwerfontwerp te leer, asook hoe om te lees en  skaak te speel.