Die ANC het die nuwe beleidsvoorstel-dokument op burgerskap, immigrasie en vlugtelingbeskerming verwelkom wat in die staatskoerant gepubliseer is, maar het gesê die praktyk dat buitelanders burgerskap verkry deur met Suid-Afrikaners te trou, afgeskaf moet word. Die witskrif wat verlede week deur dr Aaron Motsoaledi, minister van binnelandse sake aangekondig is, maak radikale verskille waarvan een is dat dit vir buitelanders en vlugtelinge baie moeiliker moet wees om burgerskap te kry. Mahlengi Bhengu-Motsiri, ANC woordvoerder, het gesê die hersiening van wette word aangevra weens die groot toestroming van ongedokumenteerde immigrante en die impak daarvan op die ekonomie en landsburgers. Bhengu-Motsiri het ook gesê die witskrif ondersteun die ANC  se resolusies wat tydens die 55ste kongres gemaak is. Die ANC moet ook oorweeg om immigrasiehowe en sentrums vir die ontvangs van vlugtelinge in grensgebiede te vestig om te verhoed dat buitelanders binne die land moet aanmeld.