Die Departement van Hoër Onderwys het om verskoning gevra dat NSFAS-begunstigdes hul studente-toelaes laat ontvang het.

Eyewitness News berig die studente wat op 25 April hul maandelikse geld moes kry, het dit eers op Sondag 27 April ontvang.

Volgens die departement is die vertraging deur ’n stelselfout veroorsaak.

NSFAS werk saam met sy finansiëledienste-instelling om die probleem op te los en toekomstige vertragings te voorkom.

Die departement sê hulle besef studente is afhanklik van die geld vir lewenskoste, en dat enige vertragings onaanvaarbaar is.

Hulle verseker studente van hul verbintenis om betalings betyds te maak en het simpatie met die impak wat die vertragings op studente se omstandighede het.