Die Bloemfontein DBV se Facebook-blad het die gemeenskap aan die gons oor ’n gans wat in haglike omstandighede in ’n trollie agter ’n winkel gevind is.
Hulle dring daarop aan dat die winkel se naam bekend gemaak moet word.
Die DBV berig hulle het onlangs ingegryp ná ’n klagte oor ’n “eend” wat in ’n koswaentjie agter ’n winkel aangehou is. Inspekteurs het egter ’n gans gevind wat ongerieflik ingehok was, sonder water of ’n geskikte omgewing.
Die eienaar het beweer dit was ’n tydelike reëling voordat die gans na ’n beter plek geneem sou word.
Ná opvoeding en ’n skriftelike waarskuwing is die gans aan die DBV oorgegee en na ’n veilige skuiling geneem.
