Twee passasiers is, in afsonderlike voorvalle die naweek, by die OR Tambo Internasionale Lughawe in Gauteng en King Shaka Internasionale Lughawe in Durban oorlede.

‘n Passasier wat van die vyfde parkeervlak by die OR Tambo Internasionale Lughawe geval het, is deur paramedici op die toneel dood verklaar.

Ondanks mediese pogings is nog ‘n passasier by King Shaka oorlede nadat hy by die binnelandse aankomsgebied ingemekaar gestort het. In beide gevalle is die oorsaak nog onbekend en word deur die polisie ondersoek. Die Suid-Afrikaanse Lughawensmaatskappy het sy innige meegevoel aan die families van die oorledenes betuig.