Drie mense is in hegtenis geneem vir beweerde betrokkenheid by ‘n sindikaat wat onwettige huwelike tussen Suid-Afrikaanse vroue en buitelanders reël.

SABC-nuus berig ’n interdissiplinêre operasie het ‘n geheime Binnelandse Sake-kantoor in Greyville, Durban, blootgelê. Vermoedelik word hierdie kantoor gebruik om onwettige huwelike en eggenotevisums te fasiliteer. Polisiewoordvoerder Robert Netshiunda sê meer inhegtenisnemings is moontlik.

Die verdagtes verkry ID-dokumente van Suid-Afrikaanse vroue en laat hulle trou met vreemdelinge, veral ongedokumenteerde buitelanders, sodat dié persone Suid-Afrikaanse burgerskap kan kry.

Die ondersoek het ‘n amptenaar van Binnelandse Sake geïdentifiseer wat saam met die verdagtes gewerk het.

Van die drie verdagtes sal twee mans van bedrog aangekla word, en ’n vrou sal teregstaan op ‘n aanklag van regsverydeling.