Die Suid-Afrikaanse Polisiediens se 2024/25 Jaarlikse Prestasieplan toon dat die wetstoepassingsliggaam ondanks massiewe begrotingsverhogings steeds sukkel om ‘n greep op die land se stygende misdaadsyfers te kry.

Een van die grootste probleme waarmee hulle te kampe het, is ‘n toenemende bevolking waarmee nuwe polisiewerwings eenvoudig nie kan byhou nie.

Die Africa Organised Crime-indeks, wat die omvang van georganiseerde misdaad en die aktiwiteite van kriminele sindikate op die vasteland ondersoek, het georganiseerde misdaad as ‘n eksistensiële bedreiging vir die toekoms van Suid-Afrika beskryf.

Intussen berig News24 dat ‘n groot gevaar vir sekuriteit, die konstruksie-mafia, reeds sy tentakels in ander sektore begin inslaan. Volgens die Spesiale Ondersoek-eenheid kos die konstruksie-mafia die land alreeds bykans R68 miljard.