Die Wes-Kaapse regering eis die opheffing van die nasionale verbod op cannabis- en hennepvoedselprodukte, aangesien dit ekonomiese groei en werkskepping benadeel.

Wes-Kaapse minister van landbou, ekonomiese ontwikkeling en toerisme, Ivan Meyer, waarsku in ’n staatsmediaverklaring dat die verbod die potensiaal van die hennepwaardeketting onderdruk en beleggers onseker maak.

Volgens die nasionale regering kan die bedryf tot R28 miljard werd wees en tot 25 000 werksgeleenthede skep.

Die Wes-Kaapse CanPlan-strategie fokus reeds op cannabis-ontwikkeling as deel van die provinsie se Growth for Jobs-plan.

Meyer dring daarop aan dat die nasionale regering die verbod herroep en eerder regulasies instel om die hennepbedryf te ondersteun en volhoubare ekonomiese groei te bevorder.