Dit gaan effens beter met die 68-jarige Oos-Vrystaatse boer, Abie Viljoen, nadat hy Vrydag ernstig beseer is toe twee aanvallers hom met klippe gegooi het.

Viljoen het onder meer ernstige kop- en gesigbeserings opgedoen, en drie van sy ribbes is ook gebreek.

Hy is Vrydagaand deur twee onbekende mans by sy plaashek in die Fouriesburg-omgewing ingewag en met klippe bestook.

Die verdagtes het met sy Isuzu-bakkie, ’n vuurwapen en kontant op die vlug geslaan.

Niemand is nog in verband met die aanval in hegtenis geneem nie.

Volksblad berig dit is die tweede plaasaanval in die Oos-Vrystaat in minder as ‘n maand.

Mike Pattinson van die plaas Summerslie by die Sterkfonteindam, se liggaam is Maandag in Qwaqwa gevind, nadat hy vroeër van sy plaas verdwyn het.