‘n Vorige werknemer van die Vrystaat Nasionale Botaniese Tuine in Bloemfontein, is ontslaan weens ‘n lening-skandaal by die werk.

IOL berig dat hy sy appèl by die Arbeidshof verloor het om sy werk terug te kry.

Monapole Daniel Kaweng het as ‘n spesialis masjienoperateur gewerk en was ook ‘n vakbondverteenwoordiger voordat hy skuldig bevind is aan die betrokkenheid by ‘n onwettige geldleningskema by die werk.

Kaweng is in Augustus 2021 afgedank.

Ontevrede met die ontslag, het hy die saak na die Kommissie vir Versoening, Bemiddeling en Arbitrasie (CCMA) geneem. Kaweng het by die CCMA gesê dat hy betrokke was by ‘n stokvel en nie ‘n onwettige geldleningskema nie, maar sy weergawe is van die hand gewys.