Hamilton in Bloemfontein is vroegoggend geruk, met skote wat knal, tydens ‘n transitorooftog op die hoek van Mill-en Vooruitsigstraat.

Volgens polisiewoordvoerder, adjudant offisier Mahlomola Kareli is die Batho-polisie ongeveer sesuur vanoggend na die toneel ontbied.

Drie veiligheidswagte wat in die transito-voertuig was, se vuurwapens is deur ‘n onbekende aantal rowers afgeneem, nadat die rowers met ‘n voertuig in die geldwa vasgejaag het.

Die rowers het ook op ‘n polisievoertuig losgebrand. Die rowers het met ‘n onbekende bedrag geld op die vlug geslaan.

Niemand is tot dusver in verband met die transitorooftog in hegtenis geneem nie, en sover bekend is niemand beseer nie.

Die paaie om die misdaadtoneel bly gesluit en mense word gevra om van alternatiewe roetes gebruik te maak.