Hoewel die staat nié die borgtogaansoeke van Devon Hofmeyr, Willem Petzer en Tewie Wessels wil teenstaan nie, is uitspraak oor borgtog Vrydag in die landdroshof op Groblersdal voorbehou.

Die drie mans staan elk tereg op aanklag van aanhitsing tot openbare geweld, vir beweerde opsweping by die borgtogverhoor van die sogenaamde Groblersdal-twee. Francois van der Merwe, van die Bittereinders-jeugbeweging, is op 24 Januarie, met betrekking tot dieselfde voorval, buite die hof in hegtenis geneem.

Die staat voer egter aan dat dit nie in openbare belang sal wees, om borgtog aan van der Merwe toe te staan nie. Luidens Netwerk24, is uitspraak tot Maandag voorbehou, sodat die borgtogaansoeke van Hofmeyr, Wessels en Petzer saam met Van der Merwe se aansoek gevoeg kan word.