Die Hooggeregshof het beslis dat President Cyril Ramaphosa se ondertekening van die Nasionale Gesondheidsversekering (NGV)-wetsontwerp hersienbaar is.

Hy moet nou redes vir sy besluit verskaf.

Volgens BusinessTech volg Dinsdag se uitspraak op ’n aansoek deur die Raad van Gesondheidsbefondsers (RGB) en die Suid-Afrikaanse Privaatpraktisynsforum.

Hulle sê die president het grondwetlike besware tydens die wetgewende proses geïgnoreer.

Die hof het bevind die ondertekening is deel van die wetgewende proses en dus hersienbaar.

Ramaphosa het tien dae om die volle rekord van sy besluit voor te lê.

Die RGB verwelkom die beslissing en sê dit wys dat geen openbare ampsdraer bo geregtelike ondersoek is nie.

Die Presidensie het nog nie kommentaar gelewer nie.