’n Brand in Voëlklip, Hermanus, is onder beheer gebring, terwyl brandbestryders in die Tuinroete-distrik steeds drie ander veldbrande beveg.

News24 berig dat die Voëlklip-brand vanoggend omstreeks 01:30 begin het.

Volgens die Overstrandmunisipaliteit se uitvoerende burgemeester, Annelie Rabie, het die brand in die rigting van die berg en Stanford versprei.

Die brand is egter onder beheer gebring, en geen beserings is aangemeld nie.

Rabie sê dit is tans onduidelik wie die brand begin het.

Brandspanne bly steeds in die gebied vir moontlike heropvlammings.

Inwoners met sproeiers of tuinslange word aangeraai om hul tuine nat te hou.

Intussen beveg brandbestryders nog drie aktiewe brande in die Tuinroete-distrik by Buffelsdrift op die N9, Jongensfontein en in die Swartbergpas.