’n Kliniese tegnoloog wat geleer het om sy emosies met kuns uit te beeld, Rudolph Pretorius, sal eersdaags sy kunswerke in Bloemfontein uitstal.

Se werke word beïnvloed deur sy ma se twee-jaar-lange stryd met demensie.

Netwerk24 berig dat Pretorius, hoewel hy ’n gespesialiseerde kliniese tegnoloog is, sy emosies wou uitbeeld deur dit met verf en kwas op ’n doek uit te stort.

Twintig skilderye, wat hy geskep het gedurende die tyd wat hy sy ma versorg het tot en met haar dood, word later in Maart in die Kotzé-kunsgalery in Bloemfontein uitgestal.

In sy werke verken hy die spirituele metamorfose tussen donker en lig, liefde en verlies, asook transendensie en wanhoop.

Sy werke neem meestal ’n impressionisties-realistiese styl aan, waar hy met kleur en lig speel, soms met potlood- of akrielverf-toevoegings. Pretorius het glo aan die einde ’n gevoel van vrede ervaar.