Premier van die Vrystaat, MaQueen Letsoha-Mathae, het Saterdag tydens ’n kerkdiens in Smithfield geslagsgebaseerde geweld as ’n “nagmerrie” beskryf.

Volgens ’n plasing op die Vrystaatse regering se Facebook-blad het sy met rou emosie teen dié krisis gepraat, wat president Cyril Ramaphosa as ’n tweede pandemie bestempel het.

Letsoha-Mathae het Suid-Afrikaners se vyandigheid teenoor mekaar en die invloed van dwelms, veral op kinders, uitgelig.

Sy het gewaarsku dat dwelmhandelaars die kinders van bekende families teiken.

Letsoha-Mathae het ook wyksraadslede gekritiseer en gesê hulle doen nie genoeg om inwoners oor staatsprogramme in te lig nie.

Sy sê hulle moet gereeld vergaderings hou om mense te bemagtig.

Sy het ’n beroep op groter eenheid, sorg en verantwoordelikheid onder leiers en gemeenskappe gedoen.