Die leier van Build One South Africa (Bosa), Mmusi Maimane, het die Minister van Finansies, Enoch Godongwana, se toewysing van R408 miljoen aan die taxi-bedryf bevraagteken.

IOL berig die geld kom van ’n ou Covid-noodfonds waarvan die laaste deel nog uitbetaal moet word.

Maimane sê belastingbetalers het reg op duidelikheid oor hoekom ’n sektor wat nie belasting betaal nie, sulke reuse-toewysings ontvang.

Hy waarsku dat die regering nie openbare fondse mag gebruik vir ondeursigtige uitgawes aan polities verbonde sektore nie.

Maimane eis ’n volledige verduideliking van Godongwana oor die sogenaamde “eenmalige taxi-fooitjie” en sê Bosa sal voortgaan om te veg vir verantwoordbare en regverdige begrotingsbesteding.