Die Mangaung Metro Munisipaliteit sê daar is ’n plan om die behuisingsprojek in Brandwag, Bloemfontein, doeltreffender te bestuur.

Volgens ’n kennisgewing op die munisipaliteit se Facebook-blad moet alle inwoners wat nie kwalifiseer nie eers geëvalueer word en ’n huurooreenkoms onderteken indien hulle wel kwalifiseer.

Die munisipaliteit sê dit is deel van ’n poging om die huurskema beter te bestuur, onder meer deur huur in te vorder en die projek meer effektief te administreer.

Die Vrystaatse Maatskaplike Behuisingsmaatskappy, FRESHCO, bly die amptelike verhuurder.

Verder sê die munisipaliteit dit wil die werkverrigting van die maatskaplike behuisingsinstelling verbeter en dienslewering verskerp.

Dit sluit die bestuur van huurders, sekuriteit, instandhouding en fasiliteite in.