’n Vrou is naby Odendaalsrus in hegtenis geneem nadat die polisie glo dwelms by haar huis gevind het.

Volgens ’n polisieverklaring was lede van Operasie Vala uMgodi besig met aksies teen onwettige mynbou toe hulle ’n wenk oor dwelmsmokkelary ontvang het.

Die huis is deursoek en gekristalliseerde metamfetamien en mandrax is glo gevind.

Die dwelms is gekonfiskeer, saam met kontant wat vermoedelik uit dwelmverkope afkomstig is.

’n Saak van dwelmhandel is by die Odendaalsrus-polisiestasie geopen.

Die vrou sal binnekort in die hof verskyn.

Operasie Vala uMgodi is ’n ontwrigtende polisiëringsinisiatief wat op misdaad in mynbougebiede fokus.