Die hoof- finansiële beampte van die Noordwes Ontwikkelingskorporasie, Kudawashe Mpofu, het bevestig dat hy onwettig in die land is en sy bedanking ingedien. Die minister van Binnelandse Sake, Aaron Motsoaledi, het die media gister ingelig dat Mpofu, ‘n Zimbabwiese burger, ‘n vervalste permanente verblyfpermit bekom het en die Spesiale Ondersoekeenheid die saak gaan ondersoek.

Volgens Motsoaledi bestaan die permitnommer nie wat op Mpofu se permanente verblyfdokument verskyn nie. Boonop is die kontrolenommer op sy bedrieglike dokument glo aan iemand anders uitgereik. Die minister het gesê dit is teleurstellend dat Mpofu met bedrieglike dokumentasie in ‘n hoë pos in die regering kon werk.