Operasie Vala uMgodi maak steeds vordering teen moontlike onwettige mynbou in die Vrystaat.

Volgens ’n polisieverklaring is ’n verdagte in hegtenis geneem nadat hy naby Welkom betrap is terwyl hy glo goudhoudende materiaal gesmelt het.

Operateurs van Operasie Vala uMgodi het hom gevind met meer as 3 kg goudhoudende materiaal en verwerkingstoerusting.

Verdere toerusting, insluitend gas- en suurstofsilinders, is in ’n mangat op die erf versteek gevind.

Die polisie het ’n saak by die Welkom-polisiestasie geopen vir die onwettige besit van goudhoudende materiaal en verwerkingstoerusting, sowel as oortreding van die Immigrasiewet.

Intussen het samewerking met privaat sekuriteit in ander dele van die Vrystaat tot die beslaglegging van plofstof en voedsel in ’n onwettige myn by Kopanong gelei.

Die verdagte sal binnekort in die hof verskyn.