Oudpres Jacob Zuma en sy uMkhonto weSizwe of MK-party, vry nou ook na Afrikaanssprekende wit mense. Zuma is gister waar hy ‘n Afrikaanse leierskapsforum in Johannesburg toegespreek het, gevra of hy ‘n bevel sal gee dat Afrikaners vermoor moet word. Zuma het gesê hy sal nooit iemand doodmaak nie.

Hy het gesê die land is verby daardie stadium en op ‘n plek waar wit en swart met mekaar kan praat. Zuma het gesê daar is nie net probleme tussen wit en swart nie maar ook onder groepe swart mense. Zuma het gesê almal moet verenig en Suid-Afrika hul eie land maak. Netwerk 24 berig Zuma het gesê daar is geen rede om hom te vrees nie, hy is maar net ‘n eenvoudige mens van Nkandla. Hy het mense gevra om saam met hom “Bring my masjiengeweer” te sing, wat hulle ook later gedoen het.