Die Organisasie teen Belastingmisbruik (Outa) het ‘n beroep op Suid-Afrika gedoen om sy stryd teen korrupsie aansienlik te verskerp. Die organisasie sê dit is omdat dit geëskaleer het tot ‘n volwaardige nasionale ramp.

Volgens die organisasie kan die mannekrag en stelsels wat nodig is om ‘n radikale teen-korrupsie-inisiatief van stapel te stuur, jaarliks tussen ses en tien miljard rand kos. Behalwe vir die finansiële winste sou die verbetering egter in aanspreeklikheid wees, die vermindering van ‘n kultuur van straffeloosheid en die strewe na ‘n meer deursigtige samelewing.

Outa sê die land het strategieë nodig, insluitend die regbank, wetstoepassing en ‘n omvattende regeringswye benadering met die burgerlike samelewing wat ‘n deurslaggewende rol speel.