Polisie het ’n koue waarskuwing aan OTM-bommers uitgereik ná ’n skietgeveg waarin vyf vermeende OTM-bommers dood is en ’n ander ernstig gewond is in eMalahleni, Mpumalanga.

News24 berig dat waarnemende adjunk-polisiekommissaris luitenant-generaal Shadrack Sibiya bevestig dat die polisie die bende al ’n geruime tyd dopgehou het en dat hulle deel uitmaak van groter sindikate.

In 2022 en 2023 is meer as 300 OTM’s per jaar opgeblaas, wat tot ’n totale verlies van byna R70 miljoen gelei het. ’n Multidissiplinêre span, wat die Valke se TOMS-eenheid, SAPD se Spesiale Taakmag en Bidvest Protea Coin insluit, het onder die vaandel van Projek Leopard saamgewerk.

Sedert Oktober het die span intelligensie ingesamel en data ontleed. Tydens Maandagoggend se operasie het die verdagtes op die polisie geskiet. Vyf wapens, insluitend twee gewere, is gekonfiskeer.