Pres. Cyril Ramaphosa het amptelik Oekraïne se president, Wolodimir Zelenski, uitgenooi vir ’n Suid-Afrikaanse besoek.

Ramaphosa se woordvoerder, Vincent Magwenya, het aan Maroela Media gesê dat die uitnodiging, wat reeds op 15 Januarie gemaak is, nog nie ’n vaste datum het nie.

Zelenski het Ramaphosa op X bedank vir Suid-Afrika se ondersteuning.

Hy het bygevoeg dat Oekraïne hoop om regverdige en ewigdurende vrede vanjaar te bereik, veral ná die verskuiwing in ondersteuning van die Amerikaanse Biden-administrasie na die Trump-administrasie.

Zelenski voel dit is belangrik dat lande dieselfde standpunt deel en niks oor Oekraïne besluit nie, tensy Oekraïne self betrokke is.

Hy sê Suid-Afrika se stem is belangrik en hulle maak staat daarop.