President Cyril Ramaphosa het sy gelukwensing aan Liz Truss oorgedra ná haar aanstelling as die nuwe eerste minister van die Verenigde Koninkryk. Suid-Afrika en die Verenigde Koninkryk geniet histories sterk en vriendskaplike betrekkinge. President Ramaphosa het gesê hy het volle vertroue dat hierdie strategiese verhouding van krag tot krag sal aanhou groei. Bilaterale samewerking tussen Suid-Afrika en die Verenigde Koninkryk dek ‘n reeks gebiede, insluitend handel en belegging, wetenskap en innovasie, gesondheid, energie en die omgewing. Intussen sal Truss vandag saam met haar senior ministers vir ‘n eerste kabinetsvergadering op haar eerste volle dag in die amp byeenkom. Rosestad-nuus het vroeër berig Koningin Elizabeth het Truss Dinsdag amptelik as eerste minister aangestel.