Suid-Afrikaanse polisiebeamptes wat tydens die uitvoering van hul pligte gesterf het, is kampvegters van wet en orde wat die grootste prys betaal het in die strewe na ‘n veiliger land. Dít aldus president Cyril Ramaphosa. Hy het die 33 offisiere en reserviste, wat in hierdie jaar tot en met Maart dood is, Sondag by die jaarlikse Suid-Afrikaanse Polisiediens-herdenkingsdag in Pretoria vereer. Die oorledenes se name is by die nasionale gedenkmuur gevoeg, terwyl hul geliefdes kranse gelê het om die ontslape vroue en mans in blou te vereer. Die president het gesê die Suid-Afrikaanse mans en vroue in blou het ‘n toenemend gevaarlike taak om wet en orde in die land te handhaaf.