Die regering vra godsdienstige leiers om padveiligheidsboodskappe tydens die Paasvakansie-pelgrimstogte aan hul gemeentelede oor te dra.

Die versoek, wat in die Staatskoerant gepubliseer is, volg ná talle ongelukke in die verlede tydens reise na en van godsdienstige byeenkomste.

Volgens hulle sal duisende mense oor die Paasnaweek met privaat of openbare vervoer reis.

Pastore moet padveiligheid in hul preke beklemtoon, aangesien veiligheid almal se verantwoordelikheid is.

Organiseerders van pelgrimstogte moet verseker dat bestuurders voldoende rus kry en dat reise behoorlik beplan word.

Openbare vervoeroperateurs moet seker maak dat hul voertuie padwaardig en nie oorlaai is nie.

Verkeersowerhede sal sigbaar wees, maar die publiek moet ook verantwoordelik optree.

Owerhede glo ‘n ongelukvrye Paasnaweek is moontlik as almal die padreëls gehoorsaam.