’n Amerikaanse regter het beslis dat Google ’n onregverdige monopolie het oor hoe advertensies aanlyn gewys word.

News24 berig die saak het Donderdag voor ’n VSA regter in Alexandria, Virginia voorgekom.

Volgens BBC het die Amerikaanse regering en 17 deelstate aangevoer dat Google beheer watter advertensies verskyn, wat ander maatskappye uitsluit en internetgebruikers benadeel.

Dit is die tweede keer in ’n jaar wat Google ’n mededingingsaak verloor het.

Die maatskappy het reeds aangedui dat dit teen die uitspraak sal appelleer.

Die beslissing kan moontlik tot groot veranderinge in Google se advertensiestelsel lei, insluitend die moontlikheid dat dele van die maatskappy verkoop moet word.

Hoewel Google aanvoer dat uitgewers hulle verkies omdat hul dienste vinnig en doeltreffend is, meen kritici dat hul beheer ander maatskappye van inkomste en geleenthede weerhou.