Met net drie rondes oor in die Vodacom Verenigde Rugbykampioenskap is al vier Suid-Afrikaanse spanne in ’n hewige stryd gewikkel vir uitspeelplekke of beter posisies.

Die Bulle en Haaie beoog om in die top vier te bly terwyl die Stormers moet wen om hul plek onder die top agt te hou en die Leeus sal moet wen ná vyf agtereenvolgende nederlae.

Die Bulle se kragmeting teen Glasgow Vrydagaand beloof vir vuurwerke met die veterane Marco van Staden wat terug in die beginspan is op nommer agt terwyl Willie le Roux vanaf die plaasvervangersbank die nodige slaankrag agterlangs kan verleen.

Saterdagmiddag speel die Leeus gasheer vir Connacht met hul seisoen wat op die spel gaan wees terwyl die Stormers vir Benetton in die DHL Stadion in Kaapstad later die aand die stryd gaan aansê.

Die Haaie is tans vierde op die punteleer en vat die onvoorspelbare Ulster in die Kingspan Stadion in Belfast aan in wat beloof om ‘n opwindende rugby naweek op ‘n hoogtepunt af te sluit.