Die gebiedshoof van korporatiewe en regulerende sake by British American Tobacco (BAT) Suid-Afrika, Johnny Moloto, het ’n beroep op die Suid-Afrikaanse inkomstediens oor onwettige sigaretfabrieke gedoen.

News24 berig hy het beklemtoon dat die Suid-Afrikaanse inkomstediens meer hulpbronne moet aanwend om groot onwettige fabrieke in die land te teiken.

Dit kom nadat die Noordwes-polisie op sigarette ter waarde van R4,5 miljoen in Brits beslag gelê het.

Polisiewoordvoerder, Amanda van Wyk, het gesê die operasie was gelei deur die nasionale eenheid vir vervalste goedere, met ondersteuning van misdaadintelligensie en die Suid-Afrikaanse inkomstediens.

Drie verdagtes is vroeër in daardie operasie in hegtenis geneem.

BAT Suid-Afrika het in 2024 aan Moneyweb bekend gemaak dat die land ongeveer R110 miljoen in belastinggeld elke werksdag weens die handel in onwettige sigarette verloor.

Die onwettige tabakbedryf bly ’n groot uitdaging wat die land miljarde rande in verlore belasting kos.