Die skadevergoeding van meer as R30-miljard vir die Julie 2021-onluste word vir onreëlmatighede ondersoek.

Netwerk24 berig die Spesiale Ondersoekeenheid (SOE) sal die staatsbeheerde versekeraar teen openbare geweld, Sasria, ondersoek vir eise en uitbetalings wat hiermee verband hou.

Verskeie maatskappye is geplunder of beskadig, wat tot miljarde rande se verlies aan verkope gelei het omdat hulle nie sake kon doen nie.

Teen November 2021 het Sasria meer as 14 000 eise ontvang, wat miljarde rande beloop het, en dit word nou ondersoek vir moontlike onreëlmatighede.

Die doel van die SOE is om te verseker dat niemand op ’n korrupte of onregverdige wyse bevoordeel word deur die eise wat uit die onluste voortspruit nie.