SOKKER – Argentinië is deur na Sondag se eindstryd in die Wêreldbeker-toernooi in Katar nadat die Suid-Amerikaanse span lag-lag vir Kroasië met 3 – 0 uitgeskakel het in die 1^ste halfeindronde wedstryd.

Kroasië het Argentinie egter in die 1^ste helfte onder druk gehad en die aanval na die ander geloods maar dit was die einste Lionel Messi wat sy span laat voorloop het in die 32^ste minuut toe hy vanaf die strafkol die bal verby die Kroasiese doelwagter Dominik Livakovic geplaas het.

Julian Alvarez het vyf minute later met ’n stukkie briljantheid drie verdedigers geklop en weer die bal verby Livakovic met ’n parmantige steekskoppie geplaas. In die 68^ste minuut was die Messi / Alvarez kombinasie weer terug en het met die 3^de doel die oorwinning vir hul span verseker.

In die 2^de halfeindronde wedstryd pak die verdedigende kampioen Frankryk die span van Marokko later vanaand om 21:00 (SA Tyd).