Die staat ontken dat hy die Amerikaanse regering mislei het om Moroadi Cholota aan Suid-Afrika uit te lewer.

The Citizen berig Cholota, die voormalige assistent van oud-premier van die Vrystaat, Ace Magashule, is een van 17 beskuldigdes in die omstrede R255 miljoen-asbesaak.

’n Verhoor-binne-’n-verhoor het Maandag in die Vrystaatse Hooggeregshof begin.

Cholota betwis die hof se jurisdiksie en die wettigheid van haar uitlewering.

Die Valke se ondersoekbeampte, Benjamin Calitz, het getuig oor haar aanvanklike bereidwilligheid om as staatsgetuie op te tree, wat later verander het.

Calitz ontken dat sy ooit gedreig is.