Die hoof van die Nasionale Rampbestuursentrum, dr. Bongani Elias Sithole, verklaar dat voedselgedraagde siektes wat voortspruit uit swak  voedselveiligheidspraktyke as ‘n nasionale ramp geklassifiseer word.

Die Suid-Afrikaanse Staatskoerant meld dat hierdie siektes reeds tot lewensverlies en siekte gelei het, en kan verdere skade veroorsaak indien dit nie aangespreek word nie.

Ingevolge hierdie klassifikasie het die Nasionale Rampbestuursentrum die primêre verantwoordelikheid vir koördinering en bestuur.

Staatsorgane word versoek om hul strukture te versterk en wetlike mandate uit te voer om die impak van die ramp te hanteer.

Die publiek, die privaat sektor en gemeenskappe word aangemoedig om voedselveiligheidswette en prosedures na te kom.

’n Multisektorale plan moet geïmplementeer word, met vorderingsverslae wat deur betrokke staatsorgane ingedien word, soos vereis deur die sentrum.