Twee vermeende stropers is buite die Krugerwildtuin in hegtenis geneem. Hulle is met onder meer agt ongelisensieerde vuurwapens en twee knaldempers betrap.

Volgens Maroela Media het die Suid-Afrikaanse Nasionale Parke (SANParke) se ondersoekeenheid vir omgewingsmisdaad, privaat sekerheidsbeamptes en wetstoepassingsbeamptes die twee verdagtes vroeër die week by Spelenyane, aangrensend aan die wildtuin, voorgekeer. SANParke-woordvoerder, JP Louw, sê dié vuurwapens het gewissel van klein- tot grootkalibervuurwapens.

Daar word vermoed dat die vuurwapens by die onwettige jag van wild (bosvleisstropery), asook renosterstropery in en om die wildtuin betrokke was. Wetstoepassingspanne het die afgelope twee maande vyf vermeende stropers in hegtenis geneem en op 12 onwettige vuurwapens beslag gelê.