Twintig mense is reeds ontslaan, vier sal binnekort breinskanderings kry, en drie wag op operasies.

So lui die nuutste mediaverklaring van die Vrystaatse Departement van Gesondheid ná ’n botsing Woensdag op die N6-pad waar tien mense oorlede en 27 beseer is.

Van die 27 beseerdes is 22 na die Stoffel Coetzee-hospitaal in Smithfield en vyf na die Pelonomi-hospitaal in Bloemfontein geneem.

Forensiese dienste het die oorledenes se liggame vir lykskouings veilig gestoor, en familie-identifikasie begin binnekort.

Die nadoodse ondersoeke vind Vrydag in Welkom plaas.

Die Vrystaatse LUR vir Gesondheid, Monyatso Mahlatsi, het die vinnige noodreaksie geprys en sy medelye met die slagoffers se families betuig.