Vier wyke in die Mangaung-metro, asook een van die Matjabeng-munisipaliteit in Odendaalsrus, moet elk ‘n nuwe wyksraadslid kry. Mmathabo Rasengane, woordvoerder van die Vrystaatse tak van die Onafhanklike Verkiesingskommissie, sê aan Netwerk24 voornemende kiesers kan die komende naweek by stemlokale registreer om in September se tussenverkiesings te stem.

In Mangaung word ‘n plaasvervanger gesoek vir Wyke 18, 20 en 22, aangesien die DA se Dave McKay, Werner Pretorius en Dulandi Leech nou almal DA-wetgewerslede is. Wyk 25 moet ‘n nuwe raadslid kry, nadat Rossouw Botes weens gesondheidsredes ‘n proporsionele raadslid vir die DA geword het. Igor Scheurkogel moet in Odendaalsrus-wyk 35 vervang word. Scheurkogel is nou DA-LP, en ook lid van die Nasionale Raad van Provinsies.