Die Suid-Afrikaanse Weerdiens sê bewerings dat ‘n sogenaamde Aphelion-verskynsel kouer as gewone weer in Suid-Afrika veroorsaak, is misleidend.

Volgens IOL verwag kenners die verskynsel op 3 Julie, wanneer die Aarde die verste van die son af is.

Die weerdiens sê egter dit het geen beduidende invloed op temperature of seisoene in Suid-Afrika nie.

Daarenteen voorspel die weerdiens temperature bo normaal vir die grootste deel van die land gedurende die winter.

Koue fronte en afsnylaagtepunte sal wel voorkom, veral in die suidkusstreke, waar dit koeler kan wees.

Reënval in die suidwestelike, oostelike en suidelike gebiede gaan na verwagting onder normaal wees.

Die El Niño-verskynsel het intussen na ‘n neutrale toestand teruggekeer en gaan waarskynlik nie die winterweer beïnvloed nie.