Bekommerde inwoners het hul frustrasie oor Bloemfontein se noordelike stortingsterrein uitgespreek tydens ‘n gemeenskapsvergadering wat by die Bloemfontein Hoërskool in Bayswater gehou is.

BloemExpress berig hierdie vergadering is deur amptenare, insluitend die hoof van die Departement vir Gemeenskapsdienste in die Mangaung Metro Munisipaliteit, Thabang Thinda, bygewoon.

Inwoners het gekla oor die ​​lugbesoedeling as gevolg van rook wat veroorsaak word deur mense wat afval verbrand asook die onwettige besetting rondom die stortingsterrein.

Volgens Thinda is die metro besig om aansoek te doen vir ‘n uitsettingsbevel van die hooggeregshof om onwettige inwoners te verwyder.

Hy het ook verduidelik dat die uitdaging rondom die stortingsterrein te wyte is aan bevolkingsgroei en vinnige verstedeliking wat bydra tot ‘n toename in afvalproduksie.