Die minister van basiese onderwys, Siviwe Gwarube, sê die nuut aangestelde lede van die Nasionale Onderwys- en Opleidingsraad bring dekades se ervaring na die tafel.

Die departement het vroeër vanjaar aangekondig dat hulle ‘n raad sal vorm om te ondersoek hoe Suid-Afrika sy onderwysstandaarde kan verbeter, insluitend die hersiening van die land se matriek-slaagsyfer.

Gwarube het Woensdag oggend die voorsitter en 14 lede van die raad aangekondig.

Sy sê die groep weerspieël ‘n doelbewuste poging om ‘n wye spektrum van kundigheid in onderwysbeleid, kurrikulumontwikkeling en -lewering bymekaar te bring.